Probinsya sang Negros Occidental ang ginpaidalom sang Department of Health sa alert level 4.
Ang alert level four nagakasayuran nga may mataas kag padayon nga nagasaka ang Covid-19 cases.
Lakip man diri ang mataas kag padayon man nga pagsaka sa utilization sang Covid-19 beds kag intensive care beds.
Yara naman sa moderate risk ang probinsya.
Sa Provincial Incident Management Team nga datus, 2,845 ang active cases as of September 19.
Samtang kahapon lamang nabaton sang probinsya gikan sa Philippine Genome Center ang report nga may walo ka samples gikan sa probinsya ang nag positibo sa delta variant. Padayon ang investigation kag verification sa sini nga mga kaso.
Duha diri ang gikan sa Escalante City, kun sa diin isa ang napatay, duha mang ang gikan sa San Carlos City kag Kabankalan City kag tig isa gikan sa Manapla kag Sagay City.
Samtang, may pila naman ka mga talatapan sa mga local government units ang nagsira.
Sa main building sang munisipyo sang Binalbagan nagsira ang local civil registrar, business permit and licensing kag talatapan sang accountant kag treasurer angut sa contact tracing nga ginapatigayon.
Sirado man ang Local Civil Registrar sang Sagay tubtob sa October 1, kasunod sang pagpaidalom sa mga personnel sa isolation.
Kasunod man sang pag positibo ni Mayor Pedro Zayco, sirado ang City Mayor’s office sang Kabankalan.
Magapahibalo naman kun san-o liwat magabukas ang mga apektado nga opisina.