Mga resorts kag commercials establishment sa apat ka mga barangay sa Bacolod temporaryo nga magasirado sa pagsaulog sang Pista ni San Juan.
Ginmandu ni Bacolod City Mayor Evelio Leonardia ang pag-suspend sang mga selebrasyon, ilabi na ang tradisyunal nga pagbasyahanay sang tubig sa Pista ni San Juan sa sini nga Huwebes.
Sa Executive Order no. 32 nga gin-issue sang alkalde, suspended man anay ang mga excursion, picnic kag iban pa nga sahi sang pagtililipon agud mapaiway ang paglaton sang Covid 19.
Ang Bacolod City isa sa mga lugar nga ginakabig high risk sang Department of Health tuga man sang pagsaka sang kaso sang Covid 19.
Gani temporaryo man nga magapanira ang mga beach resort kag iban pa nga commercial establishment kasubong sang mga bars kag coffee shop nga masami ginakadtuan sang tawo sa Barangay Punta Taytay, Pahanocoy, Granada kag Alangilan.
Ang City Legal Enforcement team kag katapo sang Bacolod City Police Office amo ang hugot nga magabantay agud mapasiguro nga wala sang magasupak sa pagsulundan sang siudad.
Ang alkalde ang nagahinyo man sang kooperasyon sang publiko agud indi na maglab-ot sa punto nga may mapasakaan pa sang kaso.