Nabatun na sang probinsya ang 1,600 ka dose sang Sinovac vaccine para sa medical frontliners sini.
Gikan sa cold storage facility sang Bacolod gin diretso ini sa cold room sang Provincial Health Office.
Dose ka mga duktor gikan sa Teresita Lopez Jalandoni Provincial Hospital, Cadiz District Hospital, Lorenzo Zayco District Hospital kag Valladolid District Hospital ang pagabakunahan bwas nga adlaw sa Silay Provincial Hospital sa ceremonial vaccination.
Ini ang paga saksihan ni Secretary Vince Dizon kaupod si Negros Occidental Governor Eugenio Jose Lacson kag lokal nga mga opisyales kag Provincial Consultant Albee Benitez.
Suno kay Atty Rayfrando Diaz, provincial administrator, 800 lang ang pagabakunahan ang nabilin nga 800 ka dose igatalana para sa second dose.
Sa sabado ang rollout ukon ang pagbakuna sa mga medical frontliners sa onse tanan ka mga ospital. Sa amo man nga adlawa ang pagpang dul-ong sang bakuna sa mga ospital. May 1,700 ka mga medical frontliners ang nagboluntaryo mag pabakuna.
Kay 800 lang ang ma accomidate karon, ang 900 nga nabilin ang pagabakunahan na sa second round sang bakuna nga maga abot nga posible AstraZeneca.