Bacolod Emergency Operations Center ang nagsapul sa tanan nga mga tag-iya sang establisimiento komersyal sa palibot sang Bacolod City Government Center para magpahanumdum sa ila sang minimum health protocols.
Isa sa mga gin isturyahan amo ang nagluntad nga gina alegar pre-Valentine concert sa The Marketplace sang nagligad nga bulan.
Suno sa deputy for medical sang Bacolod EOC nga si Dr. Chris Sorongon, ginpaathag sang mga tenants kag magagmay nga negosyante sa amo nga lugar nga wala sang concert nga natabo kundi may isa lang sa ila nga nagkanta para maghatag sang diutay nga kalingawan kag madamo sang nagpamati.
Wala sang pagsupak sang local health protocols bangud nagasuksuk sang face mask, face shield kag nagasunod sa physical distancing ang tanan.
Nagpasalig naman ang mga negosyante nga padayon sila nga magasunod sang local health protocols kag nagpasalamat man sa siudad sa pagpamati sang ila mga kinahanglanon kag paghatag sa ila sang suporta nga padayunon ang ila mga negosyo.