Ginpadal-an na sang sulat sang PNP ang mga museum sa Silay City angut sa security protocol nga dapat ipatuman kun may mga bisita.
Ini kasunod sang natabo nga pagkawat sang minilyon ka pesos nga balor sang painting sang national artist nga si Fernando Amorsolo sang nagligad nga semana.
Suno sa hepe sang Silay PNP nga si Lt. Col. Mark Anthony Darroca, makabig nga parte sang isa ka sindikato sang mga kawatan ang duha ka mga suspek nga nag kawat sang painting sa Hofileña Museum.
Magluwas sa Hofileña Museum may mga heritage houses pa gid nga ginpang convert sa museum sa ginakabig nga Paris of Negros.
Ang lalaki nga suspek, tigayon nga nakilala sang drayber sang ginsakyan nila nga trisikad pinaagi sa litrato sang mga persona nga may mga kaso sang kinawatay.
May kaso na nga daan sang pagpangawat ang amo nga lalaki sa Bacolod.
Ang upod niya naman nga babaye naga ilis pa sang bayo samtang naga sakay sa trisikad para indi makilala.
Nagapati ang PNP nga planado na sang duha ang krimen bangud nakahibalo na sila sang ila exit point kag may balon pa nga bag para butangan sang painting.
Nagbutang naman sang security guard sa Hofilena Museum ang pamilya.
Sini nga semana posible mapasakaan na sang kaso ang nagpangawat sang painting.