Pasakaan sang administrative complaint ang mga medical workers nga involved sa kamatayon sang lapsag sa Bago City Hospital sang Pebrero 18.
Suno kay Bago City Mayor Nicholas Yulo, subong nga adlaw, Martes, mahimo ipasaka ang kaso sa wala pa ginhingadlan nga mga medical practicioners.
Base sa resulta sang imbestigasyon sang fact finding committee, may nakita nga lapses sa bahin sang mga medical practitioners.
Ginpaathag ni Mayor Yulo, nga makabig nga isolated case ang insidente bangud madamo man sang may nabuligan nga pasyente ang ospital.
Wala naman gin patpat sang alkade ang iban pa nga detalye sang resulta sang imbestigasyon bangud nga confidential ini base sa Civil Service Law kag mapagwa na lamang ini kun mapasakaan na sang reklamo ang personnel sang ospital.
Pebrero 18 sang nagbun-ag sang lapsag ang iloy nga si Jennifer Saylo kag ini ang napatay bangud sa gin-alegar sang pamilya kapabayaan sa bahin sang mga medical workers sang hospital. Magluwas sa napatay nga lapsag, nangin kritikal man ang kondisyon sang iloy.
Subong nga adlaw ma-appoint si Yulo sang hearing officer kag masuguran na ang hearing.