Base sa report sang Bacolod Emergency Operations Center 691 na karon ang active COVID cases sa siudad.
Ang mga wala sang sintomas kag may mild symptoms ang nagatenir sa isolation facilities kag ang mga may severe symptoms naman ang na admit sa ospital.
77 percent sa karon ang hospital bed utilization rate para sa COVID-19 sa pito ka mga ospital sa Bacolod.
May lima na ka mga buluthuan sa siudad nga ginhimo karon nga dugang nga isolation facility.
Ginpahayag naman ni Dr. Chris Sorongon sang Bacolod EOC nga may mga hotels naman sa Bacolod nga nagaserbe man nga isolation facility sa mga makasarang magbayad.
“Then nagadugang nga nagadugang ang mga private hotels naton nga naga offer sang ila facility as an isolation facility for those nga maka afford magbayad sang ila nga hotel accommodation kag na notice naton ang profile subong sang mga pasyente nga naga positive are coming from condominiums and subdivisions so amo ni sila ya ang pala party mo, amo ni sila ang nagakadto sa mga kalan-an nga damo tawo bala so can afford man sila mag avail sang hotel,” suno kay Dr. Chris Sorongon, deputy for medical data and analysis, Bacolod EOC.
Ginpahayag naman sang medical center chief sang Corazon Locsin Montelibano Memorial Regional Hospital nga si Dr. Julius Drilon nga madamo pa man sang bakante nila nga COVID-19 beds bangud ila lamang gina admit ang mga may severe nga sintomas.
Kinahanglan karon sang mga local government units nga maghimo sang dugang nga isolation facility sa ila tagsa ka mga banwa kag siudad.
“In terms of number of beds, maswerte pa kita kay kadamuan sini as high as 87 percent are mild cases which we don’t admit so dapat ang mga mild ara na sila sa quarantine center, ang problema ang quarantine center subong nagakakulang na. That is the problem, wala kita mabutangan sang mga mild cases,” suno kay Dr. Julius Drilon, medical center chief, CLMMRH.
Samtang, isa ka 62 anyos nga cashier sang City Treasurer’s Office sa Bacolod City Government Center ang nagtaliwan kahapon bangud sang COVID-19.
Siya ang ika pito na nga empleyado sang siudad nga nagtaliwan bangud sang virus humalin sang nagligad nga tuig.
Siya ang ika 56 nga empleyado sang siudad nga nagpositibo sini lang nga bulan.