Makita sa video ang pag-gwa sang mga estudyante sang University of Negros Occidental-Recoletos, pasado las 11 Hwebes sang aga. Pati mga salakyan nagpilahay sa pagsugat sa mga estudyante.
Ini matapos nga ginsuspende ang klase kag opisina kasunod sang security threat.
Ginsiling ni Bacolod City Police Office Director Police Colonel Eugene Rebadomia, wala sang bomb threat nga natabo sa eskwelahan parehas sa una nga impormasyon nga naga-gwa online.
Suno sa iya ang pag-suspend sang klase ang bangud sa gin-report sang security office sang eskwelahan sa PNP nga may nakita nga bala sa hagdanan sang senior high school building.
Sa tupad sang bala, may papel man nga nakita ang kapulisan nga may nakasulat sang plano nga pagtimalos sa mga nagapang bully.
Matapos nga ginsuspende ang klase, nagdinaguso ang mga ginikanan sa guwa sang eskwelahan agud pang sugaton ang ila mga kabataan.
Padayon pa nga gina-usisa sang kapulisan kag sang eskwelahan kun sin-o ang nagdala sang amo nga mga bala pasulod sa campus.
Sa isa ka statement, nagpasiguro naman si Bacolod City Mayor Greg Gasataya nga wala sang physical violence nga natabo sa nasambit nga eskwelahan kag nagpangabay man ini sa publiko nga mangin kalmado kag sigurohon nga insakto ang mga impormasyon, ilabi na sa tion kaangay sini.
Samtang, may isa naman ka mensahe nga nagalapta online may angut sa plano nga pagpang-gamo sa mga eskwelahan sa Bacolod kag sa isla sang Negros.
Nalakip sa amo nga mensahe ang UNO-R, Bacolod City National High School, Maranatha, Daet Elementary School, Vinzon Piloy National Highschool, Mabini Colleges kag Camambugan National High School.
Gina-usisa pa sang kapulisan kun sa diin naghalin ang ini nga mga mensahe.
Ang persona nga nagpadala sang sini nga mensahe ang sarang makasuhan kag mapriso.
“Amo na ang gin-report sa amon nga may nakita kuno nga bala sa hagdan nga duwa ka bilog. Amo na ang ginkadtoan sang aton nga pulis. Pero wala sang bomb threat kay ang bomb threat different sa ano e. Siguro gin-report lang sang bata nga may nakita sila nga bala, amo nana siguro kay te may mga posibli nga may mga crim dira nga estudyante, wala pata kabalo kun ano. Pero ang bomb threat ya nga pamangkot sir, ang sabat namon ya wala”, suno kay Rebadomia.”
[sibwp_form id=1]