Ini ang una nga flag raising ceremony ni Bacolod City Mayor Albee Benitez, first time niya man sa public service nga mangin alkalde gani naga pangayo siya sang paghangop sa mga department heads.
Iya nga gin haylo ang mga empleyado sang siudad nga indi lang ma kontento sa pag time in kag time out sa Bacolod Government Center kundi dapat ihatag ang tanan sa pag serbisyo sa mga pumuluyo.
May eroplano pa nga nag drop off sang confetti sa tunga tunga sang programa.
Naghatag siya sang ti-un nga maka pa picture sa iya ang mga empleyado
Nag atubang sa media sang makadali, istorya niya gintigana niya ang bilog nga semana sa pag meeting sa mga department heads pero sang Domingo, naglibot siya sa dalago nga merkado sang siudad kag suno sa iya kadamo sang napabay-an nga ulubrahon kag basura sa merkado gani dapat nga unahon kag tutukan.
Matapos ang ambush interview, derecho na siya sa Mayor’s Office kag nag ilis. Gikan sa polo barong, suksok niya naman ang trade mark niya nga white polo shirt.
Gin atubang niya makadali ang mga opisyal sang Philippine Drug Enforcement Agency kun sa diin nagpasalig siya sang suporta para sa amo nga ahensya.
Nagsaylo sa MassKara Hall kun sa diin patigayunon ang meeting kaupod ang mga department heads. Ini ang ikaapat niya nga adlaw bilang alkalde sang Bacolod.