Pagsira sang mga border ukon ports of entry sa non-essential travel sang Negros Occidental ang ginpanawagan sang infectious diseases doctors kay Negros Occidental Governor Eugenio Jose Lacson.
Ang gobernador kaupod si Provincial Consultant Albee Benitez ang nagsapol kahapon kun sa diin ila nga ginpamatian ang mga ginaduso sang katapo sang medical community.
Ginaduso man sang Philippine Society for Microbiology and Infectious Diseases ang temporaryo nga indi pagtugot sang dine-in sa mga kalan—an.
Gusto man nila nga ipaiway ang social gatherings, magluwas na lamang sa haya kag lubong kag ang tugutan makatambong immediate family lamang.
Ginaduso man nila ang temporaryo nga pagsira sang non-essential businesses.
Gusto man nila nga gilayon ma manage ang mga wala sang puluy-an ukon yadtong nagatenir sa kalye.
Suno kay Provincial Administrator Rayfrando Diaz, iga adopt sang probinsya ang sarang nga ma-adopt sini. Maga deliberate ang Provincial Incident Management Team tuhoy diri.
Suno sa mga duktor nahangpan nila ang epekto sang amo nga mga restriction sa ekonomiya. Pero sila ang naga pati nga ang pagpa nubo sa kaso sang covid 19 ang maga resulta man sa kaayuhan sini.
Nalakip man sa ila nga panawagan ang nagakaigo nga pagbantay sa mga quarantine facilities, pagtugot sang home quarantine kun ang puluy-an makapasar man lamang. Ginaduso man nila ang massive information campaign para sa Covid-19 vaccines.