Sa Sipalay City, gina usisa sa karon ang natukiban nga crack sa naibabaw nga bahin sang bukid kasubong man ang pag ka usmod sang duta sakop sang Camp Valdez sa Brgy. Mambaroto.
Gin-cordone na sang siudad ang area para sa public safety.
Suno kay Dionilo Bogtae ang Disaster Risk Reduction Managment coordinator, mga personnel sang Department of Public Works and Highways nga naga panindlo sang drainage canal sadtong nagligad nga adlaw ang nakatukib matapos nga matalupangdan nila nga natampukan na sang duta ang amo nga kanal.
Suno kay Bogtae, sa report sang surveying team mga 80 meters ang kalabaon sang collapsed area.
May iban pa gid nga mga crack ang natukiban, patimaan sang pag giho sang duta suno sa DRRM.
Nag butang na sila sang markings agudto ma pat-od kun naga progress ukon padayon ang pag usmod.
Nag pakig-angut naman sila sa Mines and Geosciences Bureau para mahibaluan man kun ano ang gintunaan sini. Sang October 7, may 5.1 magnitude nga linog nga nag-igo sa Sipalay.
Pero suno kay Bogtae indi man nila sa karon mapat-od kun epekto ini sang linog.
May pila ka mga pamilya nga na-identify nga yara sa danger zone kag sila ang na abisuhan nga mag patuman sang precautionary measure.
Nakabaton man sila sang report nga may naga sulod sa gin-cordone nga area kag gina sulit ang pahanumdom nga mag cooperate bangud sang risgo.
“Actually ang dalan passable lang siya, ang aton lang da kun mag bubo ang ulan, may tendency siya, tungod kadako na sang crack kag lapit lang siya sa dalan naton, may tendency ang ina nga portion i-erode ya kag may tendency nga idal-on niya sa aton nga highway. Amo lang na ang aton access rode sa aton nga national highway going to Hinoba-an sa southern part”, suno kay Bogtae.