Sa mga pictures nga kuha sang Community Environment and Natural Resources Office makita ang ini nga mga puno sang kahoy nga lawaan, bakan, ta-ulay odling kag mga kawayan nga ginpang utod sa Barangay Celestino Villacin sa Cadiz City.
Ang amo nga area parte pa sang Northern Negros Natural Park, isa ka ginakabig nga protected area sa Pilipinas. Bulan sang agosto sang natukiban ni Charlie Analucas nga may malapit sa kwarenta nga mga century old trees nga ginpang utod sa amo nga lugar.
Katapo siya sang national greening program kag naga bulig sa pagpananum sang mga puno sang kahoy sa kabukiran.
Gilayon niya nga ginreport sa Cenro Cadiz ang amo nga insidente. Gilayon naman ini nga na respondehan.
October 5 sa liwat nga pagpadulong ni Charlie sa area may nagtindog na nga structure kag napang sarahi na ang mga puno.
Nagreklamo siya liwat sa Cenro.
November 16, gin demolish sang Cenro ang structure kag gin pang kuha ang mga kahoy. Suno sa kay John Odango, chief of staff sang Cenro, century old ang mga puno sang kahoy nga ginpang utod. Masobra sa 7,000 board feet nga kahoy ang naabtan sa lugar.
Si Charlie nagpalapit sa media para masiguro nga manabat ang sa likod sang pagpang utod sang kahoy nga isa ka anay konsehal sa Sagay City. Hungod siya nga wala gin hingadlan sang Digicast Negros kay wala pa makuha ang iya nga bahin kag wala pa siya pormal nga mapasakaan sang kaso sa korte.
Suno pa kay Odango yara na sila sa final stage sa pagpreparar sang reklamo batuk sa anay konsehal. Ang cenro ang maga preparar sang tanan nga dokumento kag ebidensya ang Office of the Park Superintendent ukon PASU amo ang maga file sang kaso sa korte.
Ang NNNP ang gina kabig nga last frontier sang Negros. Yari diri ang pinaka malapad nga watershed sa isla kag naga supply sang tubig sa pila ka mga LGU lakip na sa Bacolod City.
Ini man ang pinaka malapad nga lowland forest sang Negros kun sa diin makita ang nagkalain lain nga mga kasapatan nga endemic lang sa Negros.
Pinaagi saRepublic Act 11038 gin deklarar ini nga natural park.