Tiponon sang Bacolod City Police Office Station 1 kag sang Bacolod City Government ang masobra sa 100 ka mga barker nga ila na profile sa palibot sang Bacolod City Public Plaza para sa isa ka orientation sa Sabado, Mayo 23.
Ginsiling ni City Administrator Atty. Mark Steven Mayo, ila ilatag sa mga barker ang plano sang siudad nga maghatag sa ila sang livelihood program sa baylo nga maghalin na ang mga ini sa plaza.
Luyag sang siudad nga estriktohon ang pagpatuman sang ordinansa nga nagadumili sa mga barker sa palibot sang plaza.
Sandig sa ila pagpang-usisa, 500 tubto 1,500 pesos ang income nga makuha sang isa ka barker sa bilog nga adlaw. Nagdangat ini sa masobra isa ka gatos bangud, naga shifting ang mga ini.
Suno kay Mayo, mabudlay nga tugutan sila sa plaza bangud diri na sila nagatulog, butang nga hugot nga ginadumilian sang siudad.
Kon magsugot ang mga barker nga maghalin sa plaza baylo sang livelihood program sang siudad, iga-monitor sila sang siudad agud ma siguro nga sa negosyo gid man makadto ang kuwarta nga ila mabaton.
Biyernes sang udto, nagkipagsapul man ang siudad sa Plaza and Park Management Board agud matun-an kon ano ang mas epektibo nga tikang agud mapa bilin ang katinlo kag kahilway sang plaza, nga sa karun nagakabaton sang mga negatibo nga komento gikan sa publiko.
[sibwp_form id=1]