Ginsiling ni Silay City Mayor Joedith Gallego nga wala sila naga untat sa pag pahanumdom sa mga empleyado sang LGU nga likawan ang pag gamit ukon ang pagpakigbahin sa mga transakyon sa iligal nga droga.
Ini kasunod sang pag kadakop sang isa ka Job Order worker sang Silay sa isa ka buy-bust operation nga ginpatigayon sang Silay City PNP sadtong May 8.
Suno kay Gallego nabilanggo sa karon si Brian Celestial matapos nga mabaklan sang iligal nga droga kag nakuhaan sang suspected shabu nga naga balor sang masobra sa 115,000 pesos sa Hacienda Hinicayan sa Brgy E. Lopez.
Ginakabig sang pulis nga isa ka high value individual si Celestial nga naga trabaho bilang isa ka school watchman.Suno sa pulis ikatlo na nga JO worker sang Silay si Celestial nga nadakpan angut sa iligal nga droga sa sini nga tuig.
Tungod nga JO worker suno kay Gallego ini siya ang gilayon na dismiss sa serbisyo. Padayon man ang pag patuman sang random drug testing sa Silay.
“Gina-discourage gid na namon diri ang illegal drugs. Dapat mapalayo sila sa sina nga mga bisyo. Amo na ang amon gina ano diri nga kutob sa mga ma involve nga casual employees indi na gid na sila makabalik ya”, suno kay Gallego.