Pagkabati sang stentay dos anyos nga si Minda Talavera nga may naga rekorida sa dalan, nagwa siya para magpamati. Pensar niya una, may bag-o naman nga announcement angut sa Covid-19.
Wala siya makahibalo kun ano ang balatian nga cholera pero pinaagi sa rekorida nahangpan niya ang mensahe sang City Health Office sang silay nga kinahanglan nga mangin matinlo sa pagpang gawi sa sulod sang balay.
Si Minda residente sang Purok Cubay sa Guinhalaran. Sa ila barangay may duha na ka mga kaso sang cholera kag isa sa lantad.
Sa purok yuhom may 88 anyos nga napatay. Positibo sa cholera ang senior citizen. Suno sa iya apo, gin-LBM ang iya nga lola kag naglala kag gindala sa ospital tubtob nga napatay.
Gani kutob sa tanan nga pang gawi, purified water na ang ila nga gina gamit. Ang water sample gikan sa ila nga gripo ang ipadala sang Provincial Health Office sa Research Institute for Tropical Medicine ukon RITM.
Suno kay Punong Barangay July Opao sang Guinhalaran may 11 ka mga water refilling stations sa ila barangay kag tanan ini ipang inspeksyon kag kuhaan sang water samples.
Ginmando na ni Mayor Joedith Gallego nga dapat ginakuhaan sang water samples ang tanan nga water refilling stations sa siudad sa kada bulan para mapa laboratory testing.
Suno pa sa alkalde, sa Barangay Guinhalaran lang gindeklarar nga cholera outbreak kag indi na kinahanglan sa bilog nga siudad.
Matinlo nga pang gawi ang panawagan sang alkalde kay masami sa mahigko nga ilimnon nga tubig kag mahigko nga pagkaon naga halin ang cholera.