Indi kinahanglan nga mag panic. Ini ang ginklaro sang Provincial Health Office kasunod sang lima ka kaso sang cholera nga na-record sa probinsya.
Tatlo ka kaso sang cholera ang gin-report sa Silay City, isa sa Victorias City kag isa sa banwa sang EB Magalona.
Suno kay Provincial Health Officer, Dr Ernell Tumimbang sarang nga mabulong ang cholera nga isa ka acute intestinal infection nga gina tuga sang pagkaon ukon pag-inom sang tubig nga na contaminate sang bacteria.
“Ang reminder ko lang there’s no room for panic this time sa Negros Occidental. Indi ni ya Covid. These are treatable diseases. Ma treat ni ya by antibiotic. But I am not saying that once naglupot ka ha you take antibiotics. You have to consult your physician”, suno kay Tumimbang.
Gin-recommend sang PHO ang pagdeklara sang outbreak sa mga barangay nga may kaso sang cholera.
Sa karon ang Brgy Guinhalaran pa lamang sa Silay ang nakadeklara sang outbreak.
Paathag ni Tumimbang ang tinutuyo sang pagdeklara sang outbreak amo nga mapahibalo gilayon ang mga pumuluyo kag sila ang makapatuman sang naga kaigo nga tikang para malikawan ang amo nga infection.
“The declaration of an epidemic or an outbreak is more of an education campaign. At least pabalo sa pumuluyo na you have to be extra careful, rather than hide it”, suno kay Tumimbang.
Pwede maka deklara sang cholera outbreak sa lugar nga maka record sang isa ka cholera case makaligad ang apat ka tuig nga wala ini sang may na record nga cholera case suno kay Tumimbang.
Isa man sa pagpanghangkat sang probinsya karon ang kakulang sang pumuluyo sang access sa matinlo nga tubig, sa karon isa pa gid sa gina duso nga kampanya suno kay Tumimbang amo ang zero open defecation.
Samtang, gina hulat sang PHO ang water sample gikan sa mga barangay nga may cholera case kag ipadala ini bwas, Biyernes, sa Research Institure for Tropical Medicine para mapat-od gid ang ginhalinan sang amo nga mga kaso.