Matawhay kag masami may bakante ang mga pulungkuan nga napahamtang sa mga mass vaccination center sa mga mall kag mga kabarangayan kasubong sa Barangay Estefania.
Indi ini kasubong sang nagliligad nga semana nga nagadagsa ang mga luyag magpabakuna.
Suno kay Punong Barangay Jerry Tingson, madamo sang indi mabakunahan bangud masami nagasaka ang ila blood pressure sa screening area pa lang.
Indi man malipod nga may nagapili sang brand sang bakuna.
Sa record sang Emergency Operation Center, nagalapaw man sa ila quota ang mga kabarangayan.
Suno kay Dr. Chris Sorongon, deputy for medical data and analysis sang EOC, nagdugang sila sang mga mega vaccination center amo nga nagahalog man ang kadam-an sa mga vaccination area.
Ang bacolod ang may nagakaigo nga supply sang bakuna,nalakip diri ang donated vaccines kasubong sang Sinovac, Pfizer, Moderna kag sang ginbakal nga Astrazeneca vaccines.
Ang indi lang mapasiguro sang pamunuan sang EOC amo nga mabakunahan sang preferred vaccine brand ang mga yadtong nagapili sang bakuna sa posible liwat nga pagdagsa sang mga nagapabakuna sa vaccination centers.