May mga private schools sa probinsya ang nagdeklarar sang suspension of classes sa buas bilang pagdumdom sang ika-39 nga EDSA People Power Revolution.
Bisan pa na-downgrade sa Special Working Holiday ang pagdumdom sang People Power Revolution paagi sa presidential proclamation no 727 ni President Ferdinand Marcos, Jr., wala sang klase ang pila ka mga eskwelahan sa Bacolod, pati na ang Colegio de Sta. Ana sa Victorias City sa buas.
Ang University of Saint La Salle kag St Joseph School- La Salle sa Bacolod ang nag-anunsyo sang suspension of classs dungan sa iban pa nga La Salle Schools sa pungsod.
Sa gin-issue nga pahayag ni USLS-Bacolod President Brother Kenneth Martinez, FSC, kabahin ini sang pagdumdom nila sang pagpakigbato sang mga Pinoy kontra sa Martial Law sa idalom sang pagpamuno ni anay Presidente Ferdinand Marcos.
Nalakip sa magapatuman sang suspension of classes ang University of Negros Occidental – Recoletos, St. Scholastica’s Academy – Bacolod, Bacolod Trinity Christian School, La Consolacion College – Bacolod kag Riverside College.
Ang USLS ang magahiwat man sang programa may angut sa ESDA sa university campus.