Shadow

May mga napwersa nga mag evacuate bangud sang baha

Wala na sang Tropical Cyclone Wind Signal sa Negros Occidental kag nagbalik naman ang mga biyahe sang fast craft vessel sa normal. Pero sang kagab-i kag kaina sang kaagahon may pila ka mga LGU nga nag evacuate sang ila nga mga pumuluyo!

Sa Barangay Zone 8 sa higad sang Minuluan River sa Talisay City, gina alalayan sang mga katapo sang Citizen Crime Watch ang mga kabataan pagwa sa ila nga puluy-an samtang may bitbit nga salbabida.

Nagsaka na naman ang tubig sa mga pamalay kaina sang aga. Gani sa ika apat nga tiun sa sini nga 2021 kinahanglan na naman sang mga residente nga mag biya sa ila nga mga balay.

Suno sa mga rescuers ginbudlayan sila kay may isa ka 75 anyos nga residente nga indi gid luyag magbiya sa iya nga balay bisan ano pa ka sulit sulit nila sa iya nga delikado ang ila nga sitwasyon.

Ang mga residente ang nagpadulong lang anay sa nataasan nga bahin sang ila nga lugar. Ang garahian sang salakyan ang ginhimo anay nila nga evacuation center. Ang iban sa ila naka pang himos na sang gamit kag gin karga sa tricycle.

Nagsaka ang tubig sa suba, tuman pa ka kusog sang daludo sang tubig

Si Renalyn miniton naga hulat nga maka pauli na sila. Wala pa sila sang tinulugan humalin sang kagab-i kay naga prepar sila engkaso nga mag baha. Las singko sang kaagahon nagsaka gid ang tubig gani napilitan na sila nga mag evacuate.

Sadtong Enero otso nga baha, nabasa ang 6 ka units sang ila pisonet. Patay ang negosyo.

Pila lamang sila sa mga nag evacuate kaina sang aga bangud sang bagyo nga auring.

Sa Sagay City, kagab-i pa lang masobra sa siyento otsenta ka mga pamilya ang nag evacuate sang kagab-i pa lang bilang preparasyon na nga daan sa pagbaha.

Sa las onse kagabi nga weather bulletin sang pag asa ang bagyo auring naning isa na lang ka tropical depression bangud nag huyang na ang pwersa.

Kaina nagbalik na ang biyahe sang mga fast craft kag roro vessel padulong Iloilo kag Cebu matapos nga ma lift na ang Tropical Cyclone Wind Signal no. 1 sa bug-os nga Negros Occidental.

Leave a Reply

Your email address will not be published. Required fields are marked *

Secured By miniOrangeSecured By miniOrange