May mga baboy nga gin-report nagkalamatay sa sur nga bahin sang Negros Occidental.
Suno sa AHRANO ukon Alliance of Hog Raisers Association may mga napatay nga baboy sa Himamaylan, Kabankalan kag Ilog.
Sa video ni Levannie Cabrillos nga backyard hog raiser sa Valladolid, ila gilayon ginlubong ang napatay nila nga baboy sadtong June 4. Naghilanat ini kag naglupot kag wala na nag ayo sa gindapat nila nga bulong. Suno sa iya, may kaingod man sila nga hog raiser nga namatyan man sang baboy.
Suno kay AHRANO president, Ric Lauron, wala sila sang pat-od pa nga datus kun ano gid kadamo sang baboy nga nagkalamatay. Padayon ang assessment kag monitoring.
Pero iya man ginsiling nga may mga kakulba sa pila nila ka katapo nga basi liwat nag-igo ang African Swine Fever. Suno kay Lauron indi nagakaigo nga mag speculate kag ginahulat nila ang pahayag sang Bureau of Animal Industry kag gobyerno probinsyal angut diri.
Ginsiling ni Negros Occidental Governor Eugenio Jose Lacson nga may yara gid man sang mga nagkalamatay nga baboy pero indi massive ukon madamo kaangay sang natabo sadto sa ASF. Ang mga kaso subong, isolated.
Mahimo dala man ini sang epekto sang tig-ululan. Ginsiling ni Provincial Veterinarian Placeda Lemana naga patigayon sila sang surveillance.
Ang mga LGU gina abisuhan nga mag sunod sa protocol kag guidelines nga plastado na, kaangay sang pag palubong gilayon sang baboy nga napatay, may ASF man nga kaso nga gin-report ukon wala.
“Ang report diri sa aton ang signs and symptoms sang nagkalamatay, amo na daw gina hapo, indi na magkaon and amo na ang iban nagakapatay gid. Ang iban as reported gina rush nila sa market indi gid naton makuha ang literal nga figures sang casualty. Siling nila daw na ubos ang ila baboy pero ang iban naghingagaw man sa market. So far nagahulat kita ya sang declaration sang BAI in support man sang aton Provincial Veterinary Office, we are not in authority to speculate”, suno kay Lauron.*
[sibwp_form id=1]