Shadow

May 7 pa gid ka mga gikan sa South Africa nga manug abot sa Negros Occidental

Wala nalutsan ang probinsya. Ini ang pahayag ni Negros Occidental Governor Eugenio Jose Lacson bahin sa mga traveler gikan sa South Africa nga nag abot sa Negros Occidental.

Samtang, may pito pa gid ka mga gikan sa South Africa ang natalana nga magpadulong sa Negros Occidental.

Suno kay provincial administrator Rayfrando Diaz, naka baton sila sang abiso gikan sa Bureau of Quarantine nga sa mga nag abot gikan sa South Africa, may pito nga ang destinasyon Negros Occidental.

Sa karon ini sila ang gina monitor pa sang BOQ sa National Capital Region. Indi pa mapat-od kun ini sila mga Returning Overseas Filipinos, Overseas Filipino Worker ukon mga dumuluong suno kay Diaz.

Ang BOQ ang naga hatag sang clearance sa sini nga mga traveler kun pwede na sila maka biyahe padulong sa ila nga mga destinasyon kasunod sang compliance nila sa quarantine kag iban pa nga health protocols.

Samtang, ang damlag pa apat ka mga nag gikan sa South Africa nga yara na sa probinsya ang natalana nga mag paidalom sa swab test kag bwas nga adlaw gina paabot ang test result. Tatlo sa apat mga expatriate kag consultant sang isa ka kumbuyahan, ang isa naman Returning Overseas Filipino. Sila ang naka home quarantine sa tagsa ka mga LGU suno kay Diaz kag naka lockdown. Ang mga expatriate ang wala ginbaton sa hotel sa Bacolod para sa kuntani quarantine base sa abiso sang City Health Office.

Suno kay Dr Edwin Miraflor, Jr., ang OIC sang CHO, gin abisuhan ang tatlo sang facility quarantine agudto malikawan ang risgo sa pag lapta sang infection in kaso nga mag positibo sila sa virus. Makabig man nga discriminating suno kay Diaz, yara na sa kumbuyahan ang desisyon bahin diri.

Secured By miniOrangeSecured By miniOrange