Apat ka bag-o nga rabies nga kaso sa mga ido ang na-record sang probinsya sa bulan sang Abril.
Sa report sang Provincial Veterinary Office, duha ka rabies cases ang na record sa siudad sang La Carlota kag isa naman sa Pontevedra kag isa sa Himamaylan.
Humalin naman sa bulan sang Enero, sa kabilugan may pito na ka rabies cases sa ido ang na record.
Padayon ang pagpangbakuna sang probinsya sa mga ido kag sa bulan sang Abril, may 10,626 ka mga ido ang tigayon nga nabakunahan.
Sa banwa naman sang Hinoba-an may report sang suspected human death tuga sang rabies.
Pero suno sa PVO, ang Department of Health man lamang ang maka declare kun bala ang gintunaan sang kamatayon rabies gid man.