Taiwan, Hong Kong kag Macau kabahin sa mga lugar nga magapasundayag ang Bacolod MassKara Dancers. Ang winning performance sang Barangay Sum-ag Dancers nga nangin 2nd runner-up sa nagligad nga MassKara Streetdancing and Arena Dance Competition ang liwat masaksihan.
Pero mas pabaskugon pa sang 22 ka mga dancers ang ila choreography kabahin sa pagpanghanda sa natalana nila nga pag byahe kag pag perform sa Taiwan Lantern Parade sa Pebrero 21-26.
Upod sa Barangay Granada MassKara Dancers nga nagkampyon sang tinalikdan nga MassKara Festival competition maga-perform man sila sa Hong Kong kag Macau sa Pebrero.
Suno kay Councilor Jason Villarosa, gin imbitahan ang MassKara dancers sa Hong Kong kag Macau kag wala sang gastuhon ang siudad sa ila pag byahe.
May nabaton man nga imbitasyon sa Milan, Italy ang siudad para sa MassKara Dancers nga posible magpasundayag didto sa madasun nga tuig.
Magluwas diri, tuigan man nga nagapaindis-indis ang Bacolod MassKara Dancers sa Long Beach, California kag New York kada bulan sang Hunyo.