Ginkasuhan na ang mag-live in partner nga naaresto sang Biyernes sang gab-i matapos makuhaan sang 7,140,000 pesos nga balor sang iligal nga droga sa Barangay Guinhalaran sa siyudad sang Silay.
Pareho nga high value individual ang duha ka mga gindakop nga sanday Razel Gamazan kag Lennie Nava.
Suno kay Lt Col Antonio Benitez Jr, pamuno sang regional drug enforcement unit, lunsay mga courier ang suspek kag sila ang ginasugo lang sang ila contact sa New Bilibid Prison sa Muntinlupa.
Gikan man sa Manila ang items suno kay Benitez kag nag agi sa BREDCO port. Natago ang mga shabu sa pakete sang gatas apang natukiban sang otoridad.
Posible suno sa pulis nga para na kun tani sa Masskara celebration ang items sa Oktubre. Padayon man ang monitoring karon sang PNP ilabi na nga naga hilapit na ang selebrasyon.