Nakumpiskar sang Bacolod City Police Office ang 4.2 kilos sang ginpatihan shabu sa isa ka babaye sa ginpatigayon nga drug buy-bust sa Purok Fatima, Islamic Center, Barangay 31 sa Bacolod Martes sang gab-i.
Masobra sa 28.5 million pesos ang balor sang amo nga iligal droga nga nakuha kay alias “Riza,” 36 anyos nga residente sang amo nga lugar.
Ginsiling ni Bacolod City Police Office Director, Police Colonel Eugene Rebadomia nga sa sulod sang tatlo ka tuig, ini ang pinakadako nila nga accomplishment sa drugs.
Suno sa iya, newly identified ang suspek kag isa lamang ini ka courier. Sandig sa ila imbestigasyon, dako ang posibilidad nga may dalagko pa nga mga tawo sa likod sang suspek.
Halos tatlo ka bulan nga ginabantayan sang kapulisan ang suspek antes mapatuman ang operation.
Posible man nga nagikan sa Luzon ang droga nga nakumpiska sa suspect base man sa ila imbestigasyon.
Indi pa matumod sang kapulisan kun may dako nga drug syndicate gid man nga naga-operate sa karun sa siudad.
Dugang pa ni Rebadomia, nagbaylo na ang taktika sang mga nagaduso sang iligal nga droga sa siudad bangud kalabanan na sa mga nagaduso sa karun, mga kababainhan bangud indi sila dasig ma suspetsahan.*
[sibwp_form id=1]