MASOBRA SA LIMA KA TONELADA NGA BASURA, NAKUHA SA COASTAL AREA SANG BARANGAY SINCANG-AIRPORT SA BACOLOD CITY. MAYOR GREG LIWAT NGA NAGPANAWAGAN NGA LIKAWAN ANG PAGHABOY SANG BASURA SA MGA SUBA KAG BAYBAY
Matapos nga nag viral sa social media ang mga basura nga makit-an sa higad sang baybay sa Barangay Singcang-Airport sa Bacolod City, isa ka coastal clean-up ang ginpatigayon sang nanari-sari nga mga grupo nga ginpangunahan sang Bacolod Environment and Natural Resources ukon BENRO sang Sabado.
Yara sa 5.12 ka tonelada ukon 16 cubic meters ang kadamuon sang basura nga nakuha sang mga volunteers sa baybay sakop sang Purok 6 Litub sang amo nga barangay.
Apang, sa piyak sang ginpatigayon nga coastal clean-up, madamo sa gihapon sang basura nga makit-an sa amo nga lugar.
Nadiskubrehan ang ini nga mga basura matapos nga nasapwan sa amo nga parte sang baybay ang isa ka patay nga butanding nga nagabug-at sang apat ka tonelada.
Ginsiling ni Bacolod City Mayor Greg Gasataya nga ang mga basura nga nagadangat sa amo nga lugar ang nagikan lamang sa mga suba sang katupad sini nga mga barangay.
Suno sa iya, ini ang rason kun ngaa ila ginbutangan sang trash traps ang pila ka mga suba, agud malikawan nga magpanaog sa baybay ang mga basura nga ginahaboy sa suba.
Liwat naman nga nagpanawagan ang alkalde nga likawan ang paghaboy sang basura sa mga suba kag baybay bangud dako sini ang halit sa tion sang mga kalamidad.
[sibwp_form id=1]