Halos kadungan sang pagsaka sang presyo sang produkto petrolyo ang pagsaka man sang presyo sang bugas sa mga merkado. Gani agud man makabulig ilabi na sa mga tricycle drivers, plano sang siudad nga masuguran ang pagpanagtag sang fuel subsidy sa madasun nga semana.
Suno kay Councilor Em Ang, author sang natukod nga ordinansa, tagsa ka legitimate tricyce drivers sa siudad ang sarang makabaton sang one-time P1,000 nga fuel subsidy agud bisan paano makapamiya-piyan ini sa ila matag-adlaw nga kinahanglanon.
Sa record sang business permits and licensing office may 5, 630 ka mga tricyce ang nakakuha sang prangkisa. Sa 110 ka mga tricycle operators and drivers association sa siudad mauna nga tagaan
sang ayuda ang apat ka mga TODA sa barangay Villamonte kag Mansilingan.
Tuko ang nangin rason sang halos isa ka oras nga brownout sang Martes sang gab-i sa tatlo ka mga LGU sa Northern Negros
May emergency power interruption sang Martes sang gab-i sa bilog nga banwa sang EB Magalona, Manapla kag siudad sang Victorias humalin las otso beinte otso tubtob las nuebe beinte siyete.
Ini base man sa announcement sang Northern Negros Electric Cooperative Inc. Ang gintumod nga rason amo ang pagka kuryente sang isa ka tuko sa atubang sang patyo malapit sa Crossing Central sa Victorias City.
Ang pagka kuryente sang tuko ng nag resulta sa brownout a bilog nga coverage area sang amo nga mga LGU sa Northern Negros.
Matapos makita ang nangin kabangdanan nakaayo kag nabalik man ang power supply matapos ang halos isa ka oras.