Masobra 9,000 ka mga business applications sa Bacolod nga nagapabilin on-process natalana nga usisaon sang City Legal Office.
Antes pa man gin extend ang Business One Stop Shop sa mall sini nga Pebrero may ginpatuman na nga mapping ang Integrated Task Force sang City Legal Office agud masiguro kun may mga permit ang mga naga-negosyo sa Bacolod.
Sa record sang Business Permits and Licensing Office may 10,026 ang may yara na sang Business Permit kag masobra 9,000 ang nagapabilin on-process.
Ginsiling ni City Legal Officer Atty. Romeo Carlos Ting ,Jr., nagapadayon ang ginapatuman nga inspection sang task force sa mga commercial establishment kag kabahin sa ila gina usisa ang record sang mga business applicants nga wala gihapon na-secure sang permit.
Dugang ni Ting nga kun bisan on-process ang mga business applications maga issue sila gihapon sang notice of violation para masiguro nga ginahikot sang mga negosyante ang ila permit samtang naga-operate sang negosyo. Sandig sa City Ordinance 565 ukon ang Revised Local Revenue Code sarang multahan sa indi magnubo sa P1,000 ang mga negosyo nga wala sang permit kag pwede man mapasirad-an.