Kun maglawig pa gid ang El Nino kag magsaka pa gid ang kahalitan sa mga pananum isa sa ginalantaw sang banwa sang Cauayan amo ang pagdeklara sang state of calamity.
Suno kay Mayor John Rey Tabujara, 14 sa 25 nila ka mga barangay ang nag report sang kahalitan sa pananum bangud sang El Nino Phenomenon. Kalabanan sa ila nga humayan rainfed ukon naga salig sa ulan. Suno sa alkalde bisan gani ang tubig sa irigasyon ang apektado man karon. Indi lamang humayan kay may tubo man nga apektado suno kay Tabujara.
Ginapat-od pa nila kun ano ang mangin balasehan para sa state of calamity declaration pero may pondo man ang banwa nga sarang magamit ayhan para sa food ukon financial assistance sa mga apektado nga mangunugma ukon para sa alternative livelihood. 127 ka mangunguma ang apektado sa 126 ka ektariya sang pananum. 7.6 million pesos naman ang gin-report sang Office of the Provincial Agriculturist nga kahalitan sa humayan sa Cauayan.
“Kun magsige gid ang El Nino ang init, basi i-consider namon ma declare sang State of Calamity given nga ga amat saka ang affected area diri sa banwa sang Cauayan. May mountain area ta. May upper barangays ta, as well as coastal barangays, mostly ni are palay nga humay kag tubo”, suno kay Tabujara.