Masobra napulo ka mga balay sa Mambuloc Creek sa Barangay 2 sa Bacolod, ginapakakas sang DRRMO bangud yara sa danger zone.
Wala pa makatabok sa Halandon Bridge ang amphibious excavator sang City Engineer’s Office para mapadayon ang nasuguran nga dredging kag clearing operation sa area sang Barangay 2 sa Bacolod City.
Magluwas nga madamo gihapon ang nagaka-anod nga basura sa pagsugod sang tig-ululan, may masobra sa napulo ka mga balay nga ginakabig illegal structures ang naga-sablag sa alagyan sang excavator.
Si DRRMO head Dr. Anna Maria Laarni Pornan naghinyo na sa City Legal Office kag Bacolod Housing Authority nga mapangitaan paagi nga makakas ang mga illegal settlers nga yara sa danger zone.
Target sang DRRMO nga mahawanan ang Mambuloc creek agud nga mapahagan-hagan ang pagbaha ilabi na sa reclamation area karon nga nagsugod na ang tig-ululan.