P30M ang igatalana nga pondo sang Bacolod LGU para ipamakal sang libre nga school supply sa mga estudyante sa pampubliko nga eskwelahan sa masunod nga school year.
Wala matigayon ang pagbakal sang Bacolod LGU sang school supply nga libre kuntani ipanghatag sa masobra 72,000 ka mga estudyante sa pampubliko nga eskwelahan sang nagligad nga tuig.
Ini bangud indi makaigo ang P15M nga budget para sa kinahanglan nga mga notebook kag iban pa nga school supply para sa mga estudyante sang school year 2023-2024.
Pero ginsiling ni Councilor AL Victor Espino, pamuno sang committee on education sang konseho, nagtalana na ang Local School Board sang P30M para ipamakal sang libre nga school supplies sandig sa natukod nga ordinansa.
Ang pondo gikan sa special education fund amo ang gamiton nga pondo.
Dugang ni Espino nga mangin prayoridad sa ginsubmit nga listahan sang Department of Education ang mga school supply sa baylo sang school bags.
Sa karon gina-suguran na ang bidding process para sa procurement sang libre nga school supply nga ginapaabot mapanghatag sa madasun nga school year.