Masobra sa 160 ka mga puno sang fully grown marijuana ang nakumpiskar sang Sibulan Police Station sa Purok 5, Barangay San Antonio sang weekend.
Yara na sa kabukiran ang amo nga lugar. Suno ky Captain Joeffrey Garsola, hepe sang Sibulan PNP, maga serbe sila kuntani sang arrest warrant sa Sitio Cambahaw-Bayog sa Brgy. Tubigon sang maabtan ang lalaki nga naga pananum sang marijuana.
Suno pa sa pulis, sang makita sila sang amo nga lalaki, nagdalagan ini sa sulod sang balay kag nagkuha sang pusil apang sa dalayon nga negosasyon nagsungka sa pulis ang amo nga persona kag ginturn-over ang iya caliber .22 nga armas nga may napulo ka mga bala.
Suno sa suspek nga si Alias Michael wala siya makahibalo kun ano nga puno ang iya gintanum.
Iya lang ini ginpatubo upod sa mga puno sang saging kag iban pa nga kararuton.
Ini ang iya nga ginapangbaligya lakip na ang dahon sang marijuana.
Wala man siya kuno makahibalo nga iligal ini.
Ginabanta nga nagabalor sang P32,000 tanan ang mga tanum nga marijuana kag si alias Michael ang gin-detain sa Sibulan PNP kag maga pangatubang sang kaso nga pagsupak sa RA 9165 ukon ang Comprehensive Dangerous Drugs Act of 2002 pati na iligal nga paghupot sang armas may angut sa Comelec Gun Ban.