Senate Majority Floor Leader Senator Francis Tolentino nagpasalig nga indi maapektuhan ang pagtalakay sang mga hagna nalakip na diri ang ginalauman nga pagpasar sang mandatory ROTC sa pag-resign ni anay Senate President Miguel Zubiri. Nagapati si Senator Tolentino nga gilayon nga matagaan atensyon ang pagtalakay sang iya naduso nga mandatory ROTC bill kag ang posible pagpasar sini sa pagbalik sang session sa Senado.
Pahayag niya nga ang hagna bilang isa sa mga prayoridad ni Presidente Ferdinand Marcos, Jr., ang may dako nga impact sa nagaluntad nga tension sa West Philippine Sea.
Ang Senate Bill 1565 ang nagatuyo ibalik ang 2 ka tuig nga Basic Military and Police training program sa mga kolehiyo.
Upod sa pila pa ka mga bill nga pending sa Senado ang ginpasalig ni Tolentino nga matigayon sa pihak sang pag-resign ni anay Senate President Zubiri sa pwesto.
Si Tolentino upod sa opisyales sang Department of National Defense, PSC kag CHED upod sa mga city officials ang nagtambong sa pagbukas sang Philippine ROTC Games Visayas qualifying leg sa Panaad Park and Stadium sa Bacolod.