Balik na sa house to house vaccination ang katapo sang City Veterinary Office Vaccination team sa pila ka mga barangay sa Bacolod. Halos natapos na ang anti-rabies mass vaccination sa Barangay Taculing kag Singcang-Airport.
Madasun nga magapadulong sa Pahanocoy kag Tangub ang team para mang bakuna sang mga hinuptanan nga kuring kag ido. Sa record sang City Vet, nagalab-ot na sa kapin 20,000 ka mga ido kag kuring ang nabakunahan. Ginsiling ni Assistant City Veterinarian Dr. Jec Cabuguason, mahimo kulangon ang 1,440 doses sang vaccine gani naghinyo na sila sang dugang nga P3M nga pondo para sa bakuna.
Target sang Bacolod City Veterinary Office nga malab-ot ang herd immunity paagi sa pagbakuna sang masobra 80,000 ka mga ido kag kuring lakip na diri ang mga layaw. Ang mass vaccination kabahin sang tikang sang Bacolod LGU agud mapangapinan ang mga hinuptanan kag mapaiway ang kaso sang rabies.