Matapos ang anum ka bulan nga training, natapos na sang kapin 366 ka mga police trainees ang ila Public Safety Basic Recruit Course subong nga adlaw, Mayo 23, sa Regional Training Center 6 sa Bakyas, Barangay Mansilingan, siyudad sang Bacolod.
Gani, nagapatimaan man ini sa pagsugod sang ila career bilang uniformed personnel sang Philippine National Police.
Ginpanginbulahan ni Police Col. Ricky Neron, pamuno sang Regional Training Center 6 ang mga police trainees sa idalum sang class Masigtalas matapos nila malampuwasan ang training nga naghangkat sa ila emotionally, mentally kag physically.
Nalakip sa nasambit nga training amo ang pagtudlo sa mga police trainees sang basic knowledge kag skills sa police science, administration, combat operations kag tactics.
Iya man ginpasidunggan ang mga ginikanan kag ang mga tawo sa likod sang kada trainee nga nagasuporta kag naga-ubay sa ila tubtob mangin isa na ka matuod-tuod nga pulis.
Matapos sini, ang mga police trainees ang magapaidalum naman sa Public Safety Field Training Program kon sa diin sila ang aktwal nga iga assign sa patrol, traffic kag investigation.