Pre-demolition conference natalana sa madasun semana antes pa man ipatuman ang pagpahalin sa 22 ka mga pamilya sa Manokan Country.
Sa Enero 17, magasapol ang katapo sang City Legal Office kag Bacolod Housing Authority sa barangay officials sang Barangay 12 agud mahandaan ang natalana nga demolisyon sang mga ginakabig illegal structures sa likod sang Manokan Country.
Ginsiling ni City Legal Officer Karol Joseph Chiu nga ginakinahanglan nga ma-plastar ang pag-transfer ilabi na sang 22 ka mga nabilin nga pamilya nga apektado sang demolisyon. Nagligad nga tuig sang gin paiway ni Mayor Albee Benitez ang natalana nga demolition agud nga hilway nga makasaulog sang Paskwa kag bag-ong tuig ang mga apektado nga pamilya.
Samtang, separado nga maga-sapol liwat ang City Legal office kag Committee on Markets upod sa mga tenants sang Manokan Country para sa pagbalhin sa ila sa na-construct nga temporaryo nga baligyaan sa SM City Bacolod.
Ang SM Prime Holdings Incorporated upod sa Bacolod LGU ang nagapatuman sang development project sa 3-hectare property sang siudad sa reclamation area nalakip na diri ang Manokan Country asta sa Bays Center.