Ginkumpirmar ni Dr. Adriano Suba-an, Regional Director sang Department of Health 6 nga positibo sa COVID-19 Delta variant ang mag-asawa nga senior citizen sa probinsya sang Antique.
Sa record sang DOH 6, bulan pa sang Mayo sang nagpositibo sa virus ang mag-asawa.
Hunyo 11 sang ginpadala sa Philippine Genome Center ang samples nga nakuha sa ila RT-PCR test.
Pero antes pa man nag-gwa ang resulta sang test kaina sang aga, nagtaliwan na sang Mayo 31 ang asawa tuga man sang mas makalalaton nga virus.
Naka-rekober naman matapos gin-quarantine ang iya bana.
Ang DOH ang nagpatuman na sang contact tracing sa mga close contact sang mga pasyente.
Suno pa kay Suba-an posible man nga ipatuman ang localized lockdown sa lugar agud nga mapunggan ang paglapta sang virus.
Gin-anunsyo naman ni Presidential Spokesperson Harry Roque ang pagpasaka sang quarantine status sang Antique sa general community quarantine with heightened restrictions.
Gin-elevate man sa enhanced community quarantine ang probinsya sang Iloilo kag Iloilo City tubtob Hulyo 31.
Ini tuga man sang entry sang Covid-19 Delta Variant sa Western Visayas.