Sa Pebrero 6 target sang Land Transportation Office – Bacolod nga maka operate ang Registration Division sini sa bag-o nga talatapan sa Mayaosayao sa Barangay Mansilingan sa Bacolod City.
Ini suno kay LTO Bacolod Chief, Renato Novero nga nagsiling man nga maga una ang pag transfer sang Registration Division sa Manayaosayao kag maga sunod na lamang matapos ang mga duha ka semana ang Licensing Division.
Suno kay Novero maga sira sa Pebrero 3 ang Registration Division sa daan nga talatapan sa Cottage Road bangud sang amo nga pagsaylo natungod ma apektuhan ang server.
“February 3, close kami, Friday na.
Wala operation, ang Registration sang LTO Bacolod kay utdon namon ang server.
Dal-on namon to, te indi na pwede once ma transfer ang IP address.
So, February 6, Monday, tinguhaan namon, basta okay lang ang connection namon sa internet, normal na ang operation sa Monday”, suno kay Novero.
Ang duta kag ang building sang LTO sa Manayaosayao iya sang probinsya.
Wala sang budget ang LTO para sa infrastructure suno kay Novero.
Nagbulig man ang probinsya sa mga furniture kag fixture sang bag-o nga talatapan.
Sa Pebrero 21 ukon 22 may natalana nga programa para sa opening suno kay Novero pero ang probinsya na ang in-charge.