Picture sang mga empleyado sa Bacolod City Government Center nga nga naga-lantaw sang TV sa oras sang trabaho ang ginpadala kay Mayor Albee Benitez.
Las tres sang hapon sang makuhaan sang litrato ang lima tubtob sa anum ka mga empleyado sang City Treasurer’s Office – cash division nga nagalantaw sang TV sa sulod sang opisina sa Bacolod City Government Center.
Nakalab-ot ini sa igtalupangod ni Mayor Albee Benitez.
Gani liwat siya nga nagpahanumdom sa mga empleyado sang siudad nga dapat magserbisyo sang tampad sa pumuluyo.
May mga netizens nga naga-kwesyon kun ngaa may TV sa opisina kag nag-suggest nga kakason na lang ang mga TV sa mga offices.
Iban sa ila luyag nga mapahalin sa trabaho ang mga kasubong nga empleyado.
Pero suno kay City Administrator Pacifico Maghari, III, maga agi sa due process ang tanan.
Magahulat man sila sang paathag sang mga empleyado nga na-issuehan na sang notice to explain antes sang ginapaabot nga show cause order batuk sa ila.