5.8 magnitude nga linog sa Bogo City sa Cebu pasado la una kaina sang kaagahon ang nabatyagan man sa Bacolod City kag pila ka bahin sang Negros Occidental kag Oriental.
Una nga gin report nga magnitude 6 ang linog sa Bogo City nga nag igo 1:06 Lunes sang kaagahon.
Pero sa eathquake information number 3 nangin 5.8 magnitude na ining tectonic quake.
Sa report sang Provincial Disaster Risk Reduction Managment Office, intensity V ang gin-report sa Escalante City.
Intensity III naman sa Kabankalan City, Cadiz City, Murcia, Pulupandan, Isabela, Toboso, Manapla, Calatrava, Don Salvador Benedicto, EB Magalona, San Enrique, Bago City, Valladolid kag La Carlota City sa Negros Occidental.
Canlaon City, Guihulngan City, Tanjay City, Amlan kag San Jose sa Negros Oriental.
Intensity II naman sa Himamaylan City, Bacolod City kag pila ka bahin sang Binalbagan sa Negros Occidental.
Dumaguete City, Bacong, Sibulan kag Valencia sa Negros Oriental.
Ang kalabanan nga bahin sang Binalbagan yara sa Intensity 1.
Ang Bacolod City nag cancel sang face to face classes kasunod sang linog nga nabatyagan base man sa rekomendasyon sang CDRRMO.
Ang Bago City kag Talisay City nag suspend man sang face to face classes. Ang iban nga cancellation yara na sa discretion sang mga eskwelahan.
Sa Negros Oriental suno sa Office of the Civil Defense nag-suspend sang klase ang Manjuyod, Pamplona, Tanjay City, Bindoy kag Bais City.
Wala naman sang may gin-report nga damages suno sa OCD.
Suno kay Regional Director Donato Sermeno, III, ang guidance karon sang NDRRMC amo nga ang mga LGU mag patuman sang earthquake drills kag pabakuron ang kahandaan sa linog kag tsunami labi na nga may yara man sang Negros trench.
“Ang guidance or ang advice sang National DRRM, ang mga LGUs, kun posible mag conduct sang simulation exercise, mga drills kag i-enhance ang preparedness sa earthquake and tsunami. Amo na na subong medyo masako na ang earthquakes. May special mention to si Sec Teodoro, given nga may Negros Trench pa kita”, suno kay Sermeno.