Shadow

Limited face to face classes sa USLS suguran sa Nov. 22

YouTube player

Nakahanda na ang pasilidad, mga classroom, mga manunudlo kag masobra isa ka libo nga mga estudyante sang college of medicine kag nursing para sa natalana nga pagbalik sang limited face to face classes sa University of St La Salle Bacolod sa Nobyembre 22.

Suno sa pamunuan sang unibersidad, Nobyembre sinko sang gin-aprobahan sang Comission on Higher Education, Department of Health kag Bacolod Emergency Operations Center ang certificate of authority para sa USLS nga sugdan ang pagpatuman sang limited face to face classes para sa 3rd year kag 4th year students sang college of medicine kag nursing karon nga may pandemic.

Magluwas nga fully vaccinated ang mga manunudlo pati na mga estudyante, ginapasiguro sang unibersidad nga masunod ang pagpatuman sang health protocol agud mapunggan ang paglapta Covid-19 virus.

Ginpahayag man sang mga opisyales sang unibersidad nga indi mahapos para sa kadam-an ang mga naagyan nga pagtilaw karon nga pandemic.

Pero pinaagi sa ginapatuman nga blended learning kag pagbalik sang limited face to face classes, nagalaum sila nga mapalab-ot ang dekalidad nga edukasyon.

Bilang isa sa mga nahauna nga unibersidad nga magapatuman sang face to face classes sa Bacolod, ginapasiguro man sang natukod nga crisis management committee sang usls nga mapatuman ang mga pagsulundan sa idalom sang alert level 4 status sa siudad.

Sa August 2022 natalana magatakop ang klase . Pero karon pa lang nagaplano na ang unibersidad agud makuha ang approval sang natungdan nga mga ahensya para sa limited face to face classes sa iban pa nga educational programs sang kolehiyo sa idalom sang new normal.

Secured By miniOrangeSecured By miniOrange