![](https://i0.wp.com/digicastnegros.com/wp-content/uploads/2024/04/image-19.png?resize=810%2C456&ssl=1)
May lima ka mga kaso sang pagkalumos ang narecord sa probinsya sang Negros Occidental sa pagsulod sang semana santa.
Sa record sang Negros Occidental Police Provincial Office, base sa ila nga natipon nga impormasyon may mga reported nga insidente sang pagkalumos sa siudad sang Cadiz, La Carlota, Kabankalan, Pontevedra kag Moises Padilla.
Kalabanan sa mga napatay bangud sang pagkalumos mga menor de edad.
Isa na diri ang 11 anyos nga estudyante matapos nalumos sa Bayhao River, Brgy. Camansi sa Kabankalan City sang Domingo sang aga.
Suno sa PNP, ang biktima ang isa ka babaye nga bata nga nalumos samtang nagapaligo sa suba kaupod niya ang pakaisa nga pito ka tuig kag ang iya nga amay.
Nakalab-ot ang biktima sa madalom nga parte sang suba kag didto siya nalumos.