Papauli na kuntani ang lending supervisor sakay sang iya motorsiklo sang siya ang nakabunggo sa nagapondo nga wing van sa highway nga sakop sang Sitio Mohon, Barangay Binicuil sa Kabankalan City, Martes sang gab-i.
Dead on arrival sa ospital ang 27-anyos nga biktima nga taga Himamaylan City.
Nagwa sa imbestigasyon sang pulis nga gulpi lang nagbunggo sa likod sang nagapondo nga wing van ang motor nga halin Kabankalan City kag padulong sa Himamaylan.
Ang wing van ang gikan sa Dumaguete City kag pakadto Bacolod City sang nagdesisyon ang driver, nga magpondo sang makadali sa higad sang dalan agud mangape.
Suno sa driver sang wing van, iya gin activate ang hazard lights sang salakyan.
Pahayag ni Police Lt. Col. John Ganzon, hepe sang Kabankalan PNP, may yara sang initial settlement sa tunga sang pamilya sang lending supervisor kag tag-iya sang wing van.
“May ara settlement, ginahulat-hulat lang namon subong kay ang tag-iya sang wing van is from Luzon pa. Nag-videocall sila sang pamilya sang napatay nga driver kay initially basi may settlement kay kung lantawon ta is naka-park ang wing van. Kung i-determine ta, at fault ang motor kay siya ang nagsuhot sa wing van. Mabulig na lang to ang owner sang wing van,” suno kay Ganzon.
[sibwp_form id=1]