Padayon ang clearing operation sa dalan nga natabunan sang mga bato kag duta sa bahin sang Tukon-Tukon, Barangay Linothangan, syudad sang Canlaon, Negros Oriental.
Nagluntad ang landslide kaina las 8 sang aga bangud sa paghumok sang duta tuga sang wala untat nga pagbubo sang mabaskog nga ulan dala sang Habagat nga ginpabaskog ni Bagyong Crising.
Gin-amat-amat pala sang mga residente ang natiphag nga duta agud may maagyan ang mga motorista bisan isa lang anay ka lane. Ugaling, bangud sang kadamo sang duta, bato kag kahoy nga narumpag sa dalan, nagakinahanglan ini sang mga heavy equipment.
Nagpadala ang Canlaon LGU sang backhoe agud mapadasig ang clearing operation para maagyan na ang dalan. Nagbulig man ang katapo sang LDRRMO Canlaon sa paghawan sa lugar.
Ang nasambit nga dalan ang gina-agyan sang mga bus padulong kag halin sa syudad sang Bacolod.
May nagluntad man nga landslide sa La Castellana kaina sang kaagahon sa may Taburda Road.
Temporaryo nga wala maagyan ang amo nga bahin sang dalan bangud sang natiphag nga duta.
Gilayon ginpakadtuan sa Department of Public Works and Highways ang area para sa clearing operation.
Tinguaan ang DPWH nga mahawanan subong nga adlaw ang amo nga dalan.
May temporary lang nga alagyan nga ginhimo anay sa kilid sang karsada.
