Magaserbe kuntani sang warrant of arrest sa kaso angut sa illegal drugs ang katapo sang Police Station 3 sa isa ka persona sa Purok Langis, Barangay Banago sa Bacolod City, Biyernes sang aga.
Apang nalabyan sang mga pulis sa higad sang dalan ang duha ka mga persona nga may ginahupot nga suspected shabu, ang isa sa ila, gin-alegar may pusil.
Ginsiling ni Police Major Rondyl Tapang, hepe sang Station 3, sang dakpon na sang pulis ang duha ka mga persona, nagbato ang 49-anyos nga lalaki kag nagluntad ang pagdinumugay.
Suno kay Tapang, gintinguhaan pa sang suspek nga agawon ang armas sang pulis, rason nga natiruhan ini kag naigo sa guya.
Narekober sa pilason nga suspek ang isa ka revolver kag karon yara na sa paghinakop sang Scene of the Crime Operatives.
Yara karon sa ospital ang 49-anyos nga suspek, samtang ang iya upod nga isa ka estudyante, ang yara sa custodial facility sang Station 3.
Suno kay Tapang, magapangatubang ang duha sang kaso angut sa illegal possession of drugs, samtang dugang naman nga kaso angut sa illegal possession of firearms ang igapasaka batuk sa 49-anyos nga lalaki.*