Nakaangkon sang malubha nga pilas sa ulo ang 44-anyos nga lalaki matapos siya ang mahulog sa ginakaayo nga drainage sa Punta Coloso, Barangay 6 sa Kabankalan City, Huwebes sang kaagahon.
Makita sa kopya sang CCTV video malapit sa lugar ang pag-arangka sang motor sa nagatumpok nga balas kag bato.
Ginsiling ni Police Lt. Gilbert Alunan, deputy chief sang Kabankalan City PNP nga posible wala matalupangdan sang driver nga may ginakay-o sa lugar.
Naabtan sang mga pulis ang lalaki nga yara sa sulod sang under construction nga drainage, samtang natumba ang iya motor sa ibabaw sang kanal.
Gikan Kabankalan proper ang driver kag papauli sa iya puluy-an sa Brgy. Mambugsay sang nagluntad ang insidente.
Ang lugar nga ginluntaran sang insidente ang madulom kag may kakulang sa traffic signages, suno sa pulis.
“Wala niya lang matalupangdan nga ginakay-o na ang dalan so medyo dasig-dasig ang iya dalagan. Paglab-ot niya to sa area is wala siya nakabalo nga gina-repair gali ang dalan didto kag dulom na to bi ang area and then daw kulang sa signages. Nahulog gid siya sa ginakutkot. Indi gid man siya dalom galing kay ti tungod sa impact kag mostly head injuries bi ang naagom sang aton biktima”, suno kay Alunan.
[sibwp_form id=1]