Nagapanyapon lang sa sulod sang iya kwarto sang kagab-i sa DC-1 sa Regent Pearl Homes Subdivision sa Barangay Alijis ang biktima nga si Joeffrey Parandas, 59 anyos, sang gin sulod siya sang armado kag gin luthang.
Suno kay Lieutenant Conrado Espino, pamuno sang Police Station 7, tatlo ka lalaki ang nagpanaog sa motorsiklo sa gwa sang balay sang biktima. Duha ang nagsulod sa balay kag ang isa ang nag rekta sa kwarto ni Parandas kag nag luthang sa iya sa ulo nga iya ginkamatay.
Yara pa suno kay Espino sa sulod sang balay ang anak anakan sang biktima kag asawa sini pati na ang isa ka masahista pero wala sila matandog sang mga suspek kag ila gid lang target amo si Parandas.
Wala pa sa karon nahibaluan ka PNP kun ano ang motibo sang mga suspek sa pagpatay kay Parandas.
Ila gina lantaw kun bala may kaangtanan sa negosyo ni Parandas nga pag pautang sang kwarta bilang kabangdanan sa pagpatay sa iya.
Pareho nga natabunan ang guya sang mga suspek suno sa mga upod sa balay sang biktima.
Gina tinguhaan sang PNP nga maka kuha sang CCTV footage sa lugar agud makabulig sa pagkilala sa mga suspek.