Nakuhaan sang gina suspetsuhan shabu ang isa ka lalaki matapos ini nagpadulong sa Bacolod City Police Station 6 sa Barangay Taculing pasado las 2 sang hapon sang Domingo.
Sa impormasyon gikan sa Police Station 6, tuyo kuntani sang amo nga lalaki nga magpa-blotter sa kapulisan matapos nag alegar nga ginsakit apang paghunos niya sang iya kahita gikan sa iya bulsa, may naupod kag nadagdag nga sachet sang suspected shabu gani gilayon siya nga gin usisa kag gin aresto.
Samtang, sa Bago City, isa ka 38-anyos nga lalaki arestado matapos nga mabungguan sang truck kag nakuhaan sang masobra P400,000 nga balor sang shabu sa Barangay Taloc, Domingo man sang hapon.
Suno kay Police Lieutenant Colonel Jay F. Malong, hepe sang Bago City PNP, gikan sa Bacolod ang suspek sakay sa motor.
Maga overtake siya kuntani sa natuo nga side sang truck nga nagliko man patuo.
Bangud sang impact, natumba ang suspetsado kag nag angkon sang injury sa hawak.
Samtang ginabuligan sang mga residente ang suspetsado, may nakita sila nga isa ka improvised glass tooter kag indi niya pagbuy-an ang plastic nga iya gina-uyatan.
Pag-abot sang traffic investigator ginlantaw ang mga papeles sang motor kag bangud sang ila man nakita nga isa ka improvised glass tooter kag indi niya pagbuy-an ang plastic, nagduda na sila.
Nakita sang pulis ang unod sang plastic nga iya gina-uyatan nga mga dalagko nga sachet sang suspected shabu nga gina-bulubanta nagabug-at sang 67 ka gramos kag naga balor sang P456,000.
Naka-hospital arrest karon ang suspetsado sa Bago City Hospital kag pasakaan sang kaso nga paghupot sang iligal nga droga.