Dakop sa closed-circuit television camera footages ang pagpangawat sang isa ka lalaki sa konbento kag simbahan sang St. Jude Thaddeus Parish and Shrine sa Barangay Alijis, Bacolod City, mga pasado las 12 sang tungang gab-i sadtong Miyerkules, Hulyo 8.
Suno sa post sang simbahan, dako nga kantidad sang kwarta kag mga kagamitan ang nakuha sang lalaki.
Nagapati ang mga staff nga posible nga yara na nga daan sa sulod sang simbahan ang lalaki kag nakapanago, antes pa man nga sila ang nakapanira.
Makita sa video nga may tabon nga t-shirt sa ulo ang lalaki samtang nagapang-ukay sa mga gamit.
Nagatini-il, nakasuksok sang maong nga delargo kag may tattoo sa likod ang lalaki.
Naglibot ang mga tanod sang Brgy. Alijis kag ginpakita ang kopya sang CCTV sa mga pumuluyo apang wala sang may nakakilala sa suspek.
Sa karon, padayon pa ang imbestigasyon sang Police Station 7 sa insidente.
[sibwp_form id=1]