Kinawatan nga ido nga ginbaligya online ang narecover paagi sa PNP entrapment operation batuk sa suspek.
Natingala na lang ang pet owner sang isa ka labrador nga wala ang iya ido sa sulod sang ila puluy-an sa Barangay Alijis sang Lunes.
Suno sa pulis, nakibot na lang ang tag-iya sang makit-an ang ido nga ginabaligya online sa balor nga sinko mil pesos.
Rason kun ngaa naghinyo siya sang bulig sa Police Station 7.
Sang martes sang hapon isa ka entrapment operation ang ginpatuman sang mga kapulisan nga nagresulta sa pagkatikma sa suspek nga si Christian Pabalinas sa downtown area sang Bacolod.
Ginpasakaan na sang kaso nga theft ang suspek kag ginkalipay naman sang tag-iya nga nabalik na sa iya ang hinuptan nga ido.
Pero nagapangabay naman si Police Captain Elmer Bonilla, commander sang Police Station 7, nga bangud man sang kapuraot tuga man sang pandemic, nagakinahanglan nga mangin mabinantayon ang publiko kag ipasiguro nga indi sila mabiktima sang mga kawatan.